Gult farevarsel: Åtvarar mot flaum og skred

Hausten er heilt tydeleg her, og Meteorologisk institutt har sendt ut gule farevarsel for mykje regn, flaum og jord- og flaumskred i Vestland. Tysnes er blant områda som er omfatta av flaum- og skredvarsla, som gjeld for store delar av torsdagen.

Lokalt kan det komma mellom 60 og 80 millimeter regn på berre tolv timar. Dei store nedbørsmengdene kan føra til raskt aukande vassføring i bekkar og mindre elvar, lokale overfløymingar og skred. Det er òg fare for vanskelege køyreforhold og vassplaning.

Lauv og kvistar som tettar sluk, stikkrenner og grøfter, kan gjera situasjonen verre. Folk blir difor oppmoda om å halda vassvegane opne og sikra eigedelar i utsette område.

Forsikringsselskapet Gjensidige åtvarar om at store vassmengder kan gjera omfattande skade på hus og eigedomar.

– Stadig oftare tek overvatn nye vegar og råkar ein del som aldri har opplevd dette før, seier kommunikasjonssjef Arne Voll i Gjensidige i ei pressemelding.

Selskapet rår folk til å reinska takrenner og sluk, flytta verdigjenstandar frå utsette kjellarar og parkera bilar der vatnet ikkje samlar seg. Dei oppmodar òg båteigarar til å sjekka at lensehol ikkje er tette av lauv og anna rusk.