Gut (6) døydde etter kanovelt
Hendinga i Kyrkjevatnet torsdag ettermiddag har fått eit tragisk utfall.
«I forbindelse med redningsaksjonen etter kanovelt i Tysnes, Kyrkjevatnet, så er det bekreftet at gutten, 6 år, er omkommet. De nærmeste pårørende er varslet»
Slik lyder ei pressemelding frå politiet som blei send ut litt over klokka eitt natt til fredag. Ei melding me alle frykta skulle koma, men i lengste laget håpa ville bli annleis.
Artikkelen held fram under annonsen.
Stor redningsaksjon
Det var klokka 16.52 torsdag ettermiddag at politiet fekk melding om ein gut som var sakna etter kanovelt i Kyrkjevatnet. Dei la ut Twitter-melding om hendinga klokka 17.49. Då pågjekk det ein stor redningsaksjon i og ved vatnet.
Litt før klokka 18 skreiv Bergens Tidende at det var gjort eit funn, og at det pågjekk førstehjelp på staden. Det skal ha vore dykkarar som fann den sakna, og dette skjedde ifølgje politiet klokka 17.51.
Guten blei frakta til Haukeland universitetssjukehus med luftambulanse.
Litt før klokka 19.30 fekk «Tysnes» opplyst frå politioverbetjent Anders Opsal ved Kvam, Samnanger og Tysnes lensmannsdistrikt at guten var seks år gamal, og heimehøyrande i Tysnes kommune. Han kunne ikkje gje nærmare informasjon om guten sin tilstand då.
Men nokre timar seinare vart det altså stadfesta at livet til den unge tysnesingen diverre ikkje stod til å redda.
Tysnes kommune har oppretta livskrisestab for dei pårørande.
I lag med andre
Politiet jobbar ut frå teorien om at kanoen har velta, og at guten har falle i vatnet.
Operasjonsleiar Tom Johannessen i Vest politidistrikt sa seint torsdag kveld til BA at guten ble funne cirka 25 meter frå land.
Artikkelen held fram under annonsen.
– Han blei raskt bringa til land der det blei sett i gang livreddande tiltak, sa Johannessen.
BA skriv at det skal ha vore fire-fem andre barn med guten som velta i kanoen.
– Det har vore samtalar med personar som har vore på staden. Me veit ikkje om det har vore vaksne til stades, forklarte Johannessen.
