Har oppretta Spleis-aksjon for kreftsjuke Alexandra

Behandling i Norge ser ikkje ut til å bita på Alexandra Kongsvik (30) sin aggressive brystkreft. No er håpet å få hjelp i USA, men det kostar.

Seint søndag kveld oppretta søstera Yvonne Kongsvik ein innsamlingsaksjon på spleis.no, og oppslutnaden så langt har vore imponerande. I ti-tida måndag morgon hadde 215 givarar bidrege med over 70.000 kroner, og eit døger seinare, altså tysdag morgon, bikka ein 280.000 kroner. Då hadde om lag 850 personar gitt eit bidrag.

– Folk er veldig snille og generøse. Eg hadde ikkje venta at me skulle få så mykje så fort, sa Yvonne på telefon til «Tysnes» måndag.

Ny svulst

Oddsa såg fyrst gode ut då Alexandra blei diagnostisert med brystkreft sommaren 2020. Etter operasjon og fleire cellegiftkurar fekk ho beskjed om at ho var kreftfri, men lukka vart diverre kortvarig for den Tysnes-busette aleinemora, som deler livet med to og eit halvt år gamle Ulrik.

Då ho mistenkte at kreften var tilbake, blei ho ifølgje familien ikkje tatt på alvor av helsevesenet, som meinte det var arrvev etter operasjonen. Men det Alexandra gjekk og kjende på viste seg å vera ein svulst av ein annan og meir aggressiv type, såkalla trippel-negativ brystkreft.

No er sjansane for at Ulrik skal få ha mammaen hos seg når han veks opp svært dårlege med det behandlingstilbodet Norge har å tilby, ifølgje familien:

«Etter flere påfølgende cellegiftkurer, har hun fått beskjed om at de ikke har flere medisiner å tilby her i Norge. Selv om dette er en kreftform som er vanskelig å behandle, finnes det fremdeles mulig helbredende behandling i utlandet, spesielt med tanke på at kreften ennå ikke har spredd seg», skriv dei på innsamlingssida.

Ingen tida å mista

No kryssar dei fingrane for at Alexandra kan få råd til behandling i USA, som dei reknar med vil kosta mellom tre og fire millionar (basert på tilsvarande tilfelle).

«Det er utrolig vondt å være nødt til tigge etter støtte for et liv til en mamma, søster, datter, venn og kjæreste. Hennes og Ulriks fremtid er helt avhengig av hjelp fra nettopp deg som leser dette. Om ikke bidraget er stort, vil det likevel være av kjempestor betydning. Dessverre er det slik at all behandling i USA må forhåndsbetales, og vi har derfor ingen tid å miste», skriv familien.

Søster Yvonne fortel at Alexandra er for sliten til å stilla til intervju i lokalavisa, men det viktigaste er sjølvsagt at bodskapen om innsamlingsaksjonen blir spreidd.

– Det er livet hennar me snakkar om her, seier ho.