Hodnanes-ferja innstilt torsdag kveld - reserveferje tar over fredag

MF «Julsund» er ute av drift resten av dagen, melde Fjord1 torsdag kveld. Fredag morgon tar MF «Lifjord» over sambandet.

«Sambandet blir innstilt resten av dagen på grunn av teknisk problem», skreiv Fjord1 i ei trafikkmelding klokka 19.18 torsdag kveld.

Sambandet det er snakk om er Hodnanes-Jektevik-Nordhuglo. Allereie klokka 18.04 torsdag kveld kom den fyrste meldinga frå Fjord1, som opplyste at sambandet var mellombels innstilt på grunn av straumbrot på ferjekaien på Jektevik.

Kring 10 minutt seinare kom beskjeden om at sambandet var i gang att, før ein ny kontrabeskjed kom klokka 18.52. Då melde Fjord1 om innstilt ferje på grunn av «teknisk problem». Deretter kom meldinga om at det ikkje blir meir drift på sambandet resten av kvelden.

Seint torsdag kveld opplyste Fjord1 om at reserveferja MF «Lifjord» kjem inn i ruta frå fredag morgon. Det skal vera normal drift frå klokka 07.00 fredag morgon.