Hunden One er sakna etter husbrann

Familien Brekke oppmodar turgåarar om å halda utkikk etter ein svart og kvit border collie.

Måndag 13. mai vart huset til Karin og Lars Kristian Brekke på Gjellefall i Uggdalsdalen totalskadd i brann. Og som ei ekstra sorg oppi det heile, finn dei ikkje att hunden sin, One. No har den vore sakna i ei og ei halv veke.

– Det som er viktig for oss er at me finn hunden, anten han er i live eller død, seier Karin til «Tysnes».

Ifølgje henne skal politiet ha observert ein hund ute, medan det brann. Delar av det øydelagde huset har dessutan blitt gjennomsøkt utan funn, og familien gir difor ikkje opp håpet om at One kan koma til rette att.

– Han betyr mykje for oss. Det er jo gjetarhunden vår, og me er veldig avhengige av han.

One er med andre ord både ein arbeidskamerat, og eit familiemedlem. No ber Karin og mannen innstendig om at folk som går i fjellet, og på tur på Tysnes generelt, vil sjå etter ein svart og kvit hund av rasen border collie.

– Han er kontaktsøkande og glad i menneske, men kan nok vera redd. Han har ikkje halsband på seg, opplyser Karin.

Dersom nokon finn hunden, er det viktig at dei held seg med den.

– Ikkje gå frå han, men bli der og ta kontakt med oss eller politiet, oppmodar ho.

Lars Kristian og Karin kan nåast på tlf 415 24 915/936 80 278

Familien manglar også to svarte kattar etter husbrannen - ein langhåra, og ein korthåra.

– Begge har flåttband på seg, fortel Karin, som kryssar alt som kryssast kan for at dyra er i live.