NYE TILTAK: Vegvesenet følgjer koronasituasjonen tett. Illustrasjon: Statens vegvesen

Innfører påbod om munnbind på førarprøvar

Som følgje av auka koronasmitte, endrar Statens vegvesen smittevernnivået for førarprøvar på Stord frå gult til oransje. Endringa gjeld frå og med i dag, onsdag.

Oransje nivå inneber at alle som skal ta førarkort for bil eller tilhengar må nytta munnbind under førarprøven. Også sensor må ha på seg munnbind.

Artikkelen held fram under annonsen.

– Det viktigaste er å halda minst ein meter avstand og vaska hendene ofte, men under førarprøven blir avstanden mindre enn ein meter. Då må me bruka munnbind for å ivareta godt smittevern, seier Torbjørn Brosvik, seksjonssjef i Trafikant Vest i vegvesenet, i ei pressemelding.

Han seier at dei følgjer godt med på smittenivået i heile Vestland og Rogaland, og at dei vurderer tiltak for kvar trafikkstasjon.

– No innfører me oransje nivå på Stord og i Bergen, medan det framleis er gult nivå for dei andre trafikkstasjonane frå Eigersund til Nordfjordeid.

Gult nivå er ordinære smitteverntiltak, som til dømes godt reinhald av køyretøy før og etter prøve, og god handhygiene.