Naudetatane har kontroll etter brann-tilløp i Lunde

Onsdag klokka 10.51 melde Vest politidistrikt på Twitter at det var brann i eit båtbyggeri i Lunde. Naudetatane var då på veg.

– Det har vore branntilløp i ein dieselbrennar. Det er usikkert om det er sløkt, men dei meiner det. Ingen er skada. Det er acetylengass i bygget, og det er oppretta ein sikkerheitssone på 300 meter, sa vaktkommandør Helge Lund ved 110-sentralen til Bergens Tidende klokka 11.

Ifølgje NRK Vestland sine opplysningar var det ein god del røyk i bygget.

Klokka 11.13 skriv 110 Vest på Twitter at det ikkje er opne flammar, og at dei har sendt inn røykdykkarar. Dei skriv vidare at dei har «kontroll på gass som var lagret i bygg».

Det same melder Bergens Tidende.

– Sikkerheitssona er oppheva. Ingen er skada. De tilsette på båtbyggeriet hadde delvis fått sløkt brannen, seier operasjonsleiar Tom Johannessen i Vest politidistrikt til BT.

Rykte ut med fulle styrkar

Brannsjef Torfinn Kongsvik stadfestar litt utpå dagen onsdag at Tysnes brann og redning rykte ut med fulle styrkar etter melding om røykutvikling i båtbyggeriet.

Då dei kom til staden, fekk dei raskt kontroll på situasjonen.

– Me sende røykdykkarar inn i lokalet som tok temperatursjekk. Me fekk ut gassflaskene, og fekk lufta i bygget, fortel Kongsvik.