Mangla tre fylkestingslister
Fylkeslistene til Konservativt, Liberalistene og Partiet Sentrum mangla på eit tidspunkt i eit av røystelokala i kommunen. Saka vart toppsak hos VG, som stiller spørsmål om det er snakk om sabotasje.
I følgje VG vart det måndag oppdaga tre manglande vallister ved eit røystelokale i Tysnes kommune. Fylkestingslistene til partia Konservativt, Liberalistene og Partiet Sentrum var listene som mangla då røystelokalet opna.
VG har vore i kontakt med ordførar Kåre Martin Kleppe, som stadfestar hendinga. Han forklarar at alle listene var sendt ut til vallokalet, men at ikkje alle var sett opp.
Artikkelen held fram under annonsen.
– Det skal ikkje skje, og det er veldig dumt. Heldigvis var det den fyrste personen som skulle stemma som gav beskjed, men me skal ikkje vera avhengig av at veljarar gjev beskjed, seier ordføraren til VG.
Saka er i skrivande stund toppsak på vg.no, og har blitt plukka opp av ei rekkje andre store mediehus, inkludert Dagbladet og TV 2. I VG si sak blir det stilt spørsmål ved om det kan vera snakk om sabotasje, noko ordførar Kleppe avskriv.
