Nytt smittetilfelle påvist

Kommunen jobbar med smittesporing.

– Det har blitt påvist eitt nytt smittetilfelle på Tysnes, opplyser ordførar Kåre Martin Kleppe torsdag ettermiddag.

Etter mange månadar utan påvist smitte på Tysnes har ein person no fått tilbake eit positivt testresultat. Ordføraren fortel at kommunen no er i gang med dei vanlege rutinane for å få kontroll på smitteveg og nærkontaktar.

– Det blir no jobba med smittesporing. Det er så langt funne 15 nærkontaktar. Dei blir forhåpentlegvis testa i løpet av dagen, fortel Kleppe.

Vedkomande med den positive koronatesten er fast busett på Tysnes, og ordføraren opplyser at nærkontaktane stammar frå private besøk og samankomstar.

– Me håpar på at det ikkje blir noko spreiing av smitta. Me har vore heldige på Tysnes til no, og me håpar at me er heldige denne gongen òg. Samtidig må me gleda oss over at så mange er vaksinerte, seier Kleppe.

Det er enno ikkje klart kva slags variant av viruset som er påvist. Ordføraren fortel at den positive testen skal bli analysert.