Opptil 250.000 heimlause kattungar kan bli fødde i Noreg i løpet av ein sesong, ifølgje eit overslag gjort av Dyrebeskyttelsen Norge.
Utrekninga tek utgangspunkt i eit anslag frå Vitskapskomiteen for mat og miljø om at det finst rundt 50.000 heimlause kattar i landet. Dersom halvparten er hokattar og kvar av dei får ti kattungar på eit år, kan talet komma opp i 250.000.
Annonse
Dyrebeskyttelsen understrekar at talet er eit overslag. Dei peikar på at Noreg ikkje har dei store koloniane av heimlause kattar som ein ser i varmare land fordi mange av kattane her til lands døyr av sjukdom, svolt eller kulde.
Organisasjonen omtalar situasjonen som eit stort dyrevelferdsproblem og meiner kastrering kan avgrensa talet på heimlause kattar, medan ID-merking gjer det lettare å finna eigaren dersom dyr kjem bort.
Lokalavdelingane i Dyrebeskyttelsen brukte i fjor over 20 millionar kroner på veterinærbehandling og meir enn tre millionar kroner på fôr og kattesand til dyr dei tok inn.
