Satsar på omreisande lakseutstilling

Det Alsaker Fjordbruk-eigde selskapet Rogaland Fjordbruk har søkt Fiskeridirektoratet om visningsløyve for det nye konseptet SalmonCircus. Det melder nettstaden intrafish.no. Dei skriv at SalmonCircus-konseptet er ei omreisande lakseutstilling, som skal nå eit breitt publikum.

Ifølgje Intrafish er planen at ein skal reisa rundt i lastebil og vitja skular og andre aktuelle møteplassar, og gje folk eit innblikk i laksenæringa. Opplegget blir spesielt tilrettelagt for skuleelevar.

Som ein del av konseptet skal deltakarane få vera med på ei virtuell reise til fleire stader lokalt i Sunnhordland og Rogaland der Alsaker-konsernet driv med oppdrett, deriblant Fjon, Røvær, Sunde og Onarheim. Der skal ein få eit innblikk i dei ulike typane anlegg som blir brukt i lakseproduksjon.

Ein del av hensikta med konseptet er å visa fram næringa til område som er lite prega av havbruksnæringa, til dømes innlandsområde på Austlandet.