BÅT FUNNEN: Denne passasjerlause båten blei funnen av mannskapet på snøggbåten «Rygertroll», mellom Tysnes og Reksteren onsdag morgon.

Snøggbåtskipper fann båt på rek

No ligg båten fortøydd ved E-bryggja i hamna i Våge.

Det var litt over halv åtte onsdag morgon at skipperen på snøggbåten «Rygertroll» oppdag ein kvit Pioner-jolle på rék mellom Tysnes og Reksteren. Snøggbåten var i rute frå Våge til Reksteren då skipperen oppdaga den passasjerlause båten.

Båten er om lag 14 fot lang, med ein Tohatsu 9,9 hk påmontert.

Artikkelen held fram under annonsen.

Skipperen trur at båten må ha slite seg, og at det ikkje har vore nokon om bord. Årane ligg fint i båten og motoren var dregen opp. Han har meldt frå til Kystradio sør om funnet.

– No har me fortøydd båten ved E-bryggja i Våge, fortel han.

Så langt veit han ikkje kven som eig båten, eller om eigaren bur på Reksteren eller Tysnes.

– Det har vore litt nordavind i det siste. Det er vanskeleg å seia om den har kome rekande frå Os eller om han høyrer til her på Tysnes, seier han.