Steinras i transformator - fleire er utan straum
Ein stein har øydelagt transformatoren i Henningshagen på Onarheim. Elleve bustader er utan straum.
Klokka 13:05 i dag fekk BKK Nett region søraust melding om ras i Henningshagen. Ein stor kampestein har rast gjennom taket på transformatorhytta som ligg i Henningshagen byggjefelt.
Vil truleg ta fleire timar
Kjell Enes, overordna vakthavande i BKK Nett region søraust, opplyser at dei har sju mann i sving for å ordna skadane så fort som råd.
Artikkelen held fram under annonsen.
– Me har sikra området, og undersøkjar no kor mykje som er øydelagt, slik at me kan vurdera korleis me skal fiksa dette, opplyser han.
Enes håpar at abonnentane i Henningshagen vil ha straumen tilbake i seks-sjutida.
I skrivande stund blir det henta aggregat, slik at BKK Nett kan gi folk provisorisk straumforsyning. Truleg vil transformatoren bli byta ut med ein ny.
Ingen personskadar
Odd Arild Langeland i BKK Nett AS region søraust er blant arbeidarane frå BKK som arbeidar iherdig for å få orden på skadane etter steinraset.
– Området skulle vore sikra ved utbygging av byggjefeltet, seier Langeland.
– Dette er berre materielle skader. Det hadde vore mykje verre viss det hadde vore ungar involvert, avsluttar han.