Stor fare for is ut dagen
Publisert
Sist oppdatert
Meteorologisk institutt har sendt ut farevarsel for is i samband med vêrskifte før helga.
Etter fleire dagar med minusgradar slår vêret om frå fredag ettermiddag. Utover dagen er det venta plussgradar og nedbør.
Annonse
– Nedbøren vil starta som snø eller sludd dei fleste stader, heiter det i farevarselet, som gjeld for store delar av Vestlandet.
Det er gult farevarsel, som er det lågaste nivået. Det er venta mest is i indre og midtre strøk av Vestland fylke. Faren aukar frå fredag klokka 12, og avtar laurdag morgon.
På yr.no melder meteorologane at det kan bli lokalt vanskelege køyreforhold. Dei tilrår folk å setja av ekstra tid til transport og køyring.
– Bruk riktige dekk og køyr etter forholda, oppmodar dei.
Annonse
Isen kjem av at regnet vil frysa på den kalde bakken. Vegbana kan lokalt bli dekka av våt is. Også der folk ferdast til fots kan det bli farleg, og meteorologane melder om fare for hålkeføre.
– Ver merksam på at isen kan vera vanskeleg å sjå, avsluttar dei.
