Tilskot til nye skilt

Riksantikvaren har løyvt tilskot til nytt informasjonsskilt for gravfeltet på Årbakka og til utskifting og flytting av informasjonsskiltet for gravfeltet i Uggdalsdalen.

Det blir løyvt 27.000 kroner til nytt skilt på Årbakka, berre 100 kroner mindre enn det blei søkt om. Total kostnadsramme er på 54.200 kroner. Tiltaket må vera gjennomført innan 1. november i år, ifølgje vedtaksbrevet sendt til Tysnes kommune frå Vestland fylkeskommune.

Når det gjeld skiltet for gravplassen i Uggdalsdalen, er det Vestland fylkeskommune sjølv som står som søkjar av tilskotet i samråd med kommunen. Her løyver Riksantikvaren heile søknadssummen på 29.500 kroner, og prosjektet har ein totalkostnad på 64.500 kroner.

Seniorrådgjevar i Vestland fylkeskommune, Solveig Lohne Rongved, opplyser at prosjektet dreier seg om å skifta ut det eksisterande skiltet i Uggdalsdalen og flytta det til ei plassering som er meir tilgjengeleg.

– Arbeidet med nytt skilt vil truleg ta til vinteren 2026/27, skriv ho i ein e-post til avisa.