To nye smittetilfelle

To hytteturistar har fått påvist koronasmitte. Dei har ingen nærkontaktar på Tysnes, og ingen relasjon til smittetilfellet torsdag.

Torsdag opplyste ordførar Kåre Martin Kleppe at det var påvist eit nytt tilfelle av koronaviruset i kommunen. Minst 15 nærkontaktar blei sett i karantene og sendt til testing. No opplyser ordføraren at alle er testa, og at det førebels ikkje er kome positive testresultat blant nærkontaktane.

– Men det er ikkje alle testsvara som er komne enno, seier Kleppe.

Samstundes opplyser han om at det i dag har blitt påvist to nye smittetilfelle i kommunen, som ikkje er relaterte til tilfellet torsdag. Dei to som har blitt smitta har relasjon til kvarandre, og er ikkje fastbuande i kommunen.

– Det er fritidsreisande som no sit i isolasjon på hytta, seier Kleppe.

Kommunen har fullført smittesporing ved desse tilfella, og ikkje funne nokre nærkontaktar lokalt på Tysnes. Smittevegen er kjent.