Tysnes-innpendlar koronasmitta
Ein tilsett ved Mestringshusene, som er busett i Bjørnafjorden kommune, har fått påvist koronasmitte. Det opplyser ordførar Kåre Martin Kleppe fredag ettermiddag.
– Det er påvist eit tilfelle av den britiske varianten hos ein tilsett ved Mestringshusene, fortel ordførar Kåre Martin Kleppe.
Vedkomande er ikkje busett i Tysnes, men pendlar frå Bjørnafjorden kommune.
Artikkelen held fram under annonsen.
– Personen har hatt ti nærkontaktar på Mestringshusene. Nokon av dei er fast busette på Tysnes, medan nokon bur utanfor kommunen, seier Kleppe.
Forutan nærkontaktane på arbeidsplassen, har vedkomande ikkje hatt nærkontaktar i Tysnes kommune.
– Nærkontaktane er sett i karantene og blir testa, opplyser ordføraren.
