Oppdatert: Set inn ny reserveferje

MF «Sulafjord» har fått tekniske problem. MF «Sogn» blir sett inn på Våge-Halhjem-sambandet, med oppstart 19.45 frå Halhjem.

– Grunna tekniske problem er sambandet innstilt inntil vidare, frå og med 15.15 avgangen frå Halhjem, skriv Fjord1 på eigne heimesider laurdag.

Måndag blei «Kommandøren» sett ut av sambandet med ein propellskade. No er det reserveferja «Sulafjord» som er innstilt på grunn av tekniske problem.

– «Sulafjord» har problem med ein styremaskin, fortel Bjørn Grønbech Barstad, operativ leiar i Fjord1 til «Tysnes».

Han opplyser at dei jobbar med å få ny reserveferje, MF «Sogn», klar til å setjast inn i sambandet.

– Me får «Sogn» klar til å reisa frå Sunde kvart augeblikk, fortel Grønbech Barstad.

Så fort reserveferja er på veg, kan det opplysast nærare om når sambandet startar opp att, men den operative leiaren trur dei kan få ferja inn til Halhjem ein gong mellom 18.15- og 19.45-avgangen.

Klokka 17.12 melder Fjord1 at sambandet er tilbake i normal drift frå og med avgangen 19.45 frå Halhjem.