Oppstart frå Halhjem 15.30
Reservefartøy blir sett inn i Våge-Halhjem-sambandet tysdag ettermiddag.
Ei rekke ferjeavgangar på Våge-Halhjem-sambandet har blitt innstilte tysdag.
Klokka 10.40 melde regionleiar i Fjord1, Tor Kristoffersen, at driftsproblema skuldast ein trafo.
Artikkelen held fram under annonsen.
– Me driv no med feilsøking, for å prøva å finna ut om trafoen kan reparerast eller om den må skiftast, sa Kristoffersen til «Tysnes» klokka 10.40.
I tillegg til å prøva og løysa problemet på MF «Kommandøren», jobba ferjeselskapet med alternativet med å setja inn reserveferje. Reserveferja låg på Sunde.
– No jobbar me med å få på plass mannskap på reserveferja, sa han.
Klokka 12.04 kom meldinga om at reserveferja «Sogn» blir sett inn i sambandet. Fjord1 melde vidare om oppstart i sambandet frå 15.30-avgangen frå Halhjem.
Den fyrste meldinga om driftsproblem og innstilling kom klokka 05.33 tysdag morgon, då det vart meldt at sambandet blir innstilt inntil vidare «grunna driftsproblem».
Tre kvarter seinare kom meldinga om normal drift i sambandet frå 06.50-avgangen frå Våge.
Men ferja fekk berre gjennomført éin rundtur, før det kom beskjed om ny innstilling. Klokka 08.07, medan dei siste bilane vart sleppte av i Våge, melder Fjord1 at sambandet igjen er innstilt inntil vidare på grunn av driftsproblem.
Etter at 08.10-avgangen blei innstilt, fekk «Tysnes» av kapteinen på MF «Kommandøren» opplyst at planen då var at ferja skulle gå i rute att klokka 10.00 frå Våge. Men det skjedde ikkje.
Artikkelen held fram under annonsen.