REGN: Det er meldt store nedbørsmengder onsdag ettermiddag og kveld. (Arkivfoto)

Ventar store nedbørsmengder

Yr.no har sendt ut oransje farevarsel om mykje regn onsdag ettermiddag og kveld. Torsdag er det venta vind og snø over 300 m.o.h.

«Fare for overvann i tettbygde områder», «fare for stengte veier og/eller overvann ved bekke- og elveløp» og «vanskelige kjøreforhold grunnet overvann og fare for vannplaning», står det i det i oransje farevarselet Yr har sendt ut om svært mykje regn utover onsdagen.

Ifølgje vêrmeldinga er det på Onarheim venta mellom 6,1 og 21,8 millimeter regn mellom klokka 12 og 18 i dag, og mellom 11,3 og 29,6 millimeter mellom klokka 18 og 24. Regnet er venta å vara litt utover nattetimane også.

På nordsida av øya er det òg meldt store mengder nedbør, men nokre millimeter mindre enn på Onarheim-sida. Det er i tillegg meldt frisk bris frå sør med styrke på kring 9-10 m/s.

Natt til torsdag snur vinden til nordvestleg retning, og tar seg opp i styrke. Yr har sendt ut gult farevarsel, og varslar vindkast opp mot 25-30 m/s i områda kring Tysnes. Kring klokka 10 torsdag skal vinden avta.

I løpet av onsdagskvelden kjem også temperaturen til å synka, og torsdag morgon er det berre meldt nokre få plussgrader. Det kan bety at den venta nedbøren kjem som sludd i låglandet, og som snø høgare oppe. Ifølgje Yr er det venta kring 10-20 centimeter med snø i område over 300 meter over havet. Det blir oppmoda om å køyra etter forholda, og bruka riktige dekk.

Ifølgje langtidsvarselet til Yr kjem det til å bli kaldt og fint fredag, før temperaturane stabiliserer seg på kring 7-9 grader frå og med laurdag og fleire dagar fram i tid. Det er samtidig venta ein god del regn i den komande veka, spesielt laurdag og søndag.