Vestland toppar statistikken over sletta studiegjeld

Lånekassen har så langt i år sletta studielån for over 1,36 milliardar kroner gjennom ordningane for gjeldssletting i distriktskommunar og i tiltakssona i Nord-Noreg. Det kjem fram i ei ny pressemelding.

Vestland toppar fylkesoversikta med over 300 millionar kroner i sletta studiegjeld. Sunnfjord ligg øvst på kommuneoversikta, med 50 millionar kroner.

På landsbasis har rundt 60.000 personar søkt om å få sletta studiegjeld, og om lag 50.000 har fått søknaden innvilga. Av desse er 68 prosent under 40 år, medan 62 prosent er kvinner.

Gjennom den nye distriktsordninga kan yrkesaktive som bur i utvalde kommunar, få sletta inntil 25.000 kroner i studielån årleg. I Finnmark og Nord-Troms kan låntakarar få sletta inntil 60.000 kroner.

Av det samla beløpet er 1,1 milliardar kroner sletta gjennom distriktsordninga, medan 260 millionar kroner er sletta i tiltakssona.

Lånekassen minner om at ein må søkja om gjeldssletting innan tre månader etter at oppteningsperioden på 12 samanhengande månader er over. Dei som søkjer for seint, risikerer å mista delar av oppteningstida. Ein må òg søkja på nytt kvart år.