TRIM-APP: I SommarTrimTysnes kan ein samla poeng frå nærmare 40 turmål, både enkle og meir krevjande. Konkurransen er aktiv frå 1. mai til 31. august. (Arkivfoto)

Åra går – sommartrimmen består

Så var det blitt den tida på året igjen. Laurdag går startskotet for den sjette utgåva av SommarTrimTysnes – konkurransen som kvart år er med på å motivera mange til å koma seg ut på tur, og der ein er med i trekkinga av ulike gåvekort.

– Det var litt aukande oppslutnad i fjor med 216 deltakarar, og me håpar på over 200 også i år, seier Ingrid H. Haaland, dagleg leiar i BKK Breiband.

Som vanleg er den lokale sommartrimmen eit samarbeid mellom BKK Breiband avdeling Tysnes, Tysnes Treningssenter og SvingenPuls. Haaland fortel at det er fleire som har sommartrimmen i tankane gjennom vinteren, og som tek kontakt om nye turmål eller presisering av løypene.

– I år er det for fyrste gong med eit turmål utanfor kommunen, men berre nokre få kilometer utanfor. Turen til Stussvikhovda (323 moh.) er fin, og bør absolutt testast, fortel Haaland.

Avslutningsvis kjem ho med ei påminning som kan vera grei å ha med seg, spesielt for nye deltakarar:

– Det er mange fine stiar i kommunen, men for å få spreidde og varierte turar har me også turar der ein lett blir våt på beina. Enkelte stader er det lite merka, så det er alltid lurt å nytta kartet når ein testar ut nye turmål.

Meir om SommarTrimTysnes kan ein lesa her.