Dette skjer i helga

Det ligg an til å bli ei helg med fint haustvêr, og då passar det bra at mykje av det som står på arrangementskalenderen for helga er utandørsaktivitetar.

Først ut er det første Rosa sløyfe-løpet som blir arrangert på Tysnes. Laurdag ettermiddag kan alle som vil vera med og springa, jogga eller gå til inntekt for ei god sak vera med på ein fin tur rundt Kyrkjevatnet i Uggdal.

Påmeldinga er open heilt fram til løpet startar. I skrivande stund har 238 personar meldt seg på.

Om du er rask til beins, kan du gå eller springa opp til kunstgrasbana på Reiso etter Rosa sløyfe-løpet, der A-laget til Njardar tar imot Eidsvåg i det som blir årets siste heimekamp for herrelaget til Tysnes.

Samstundes som fotballkampen startar på Reiso, startar ein haustbasar i Tveit Grendahus. Dessverre er det ikkje mogleg å vera to stader på ein gong, men for dei som treng ein pause frå finvêret og vil prøva lukka på basar, er altså Tveit staden å vera laurdag ettermiddag.

Laurdagen kan deretter bli runda av med eit betre måltid på Haaheim Gaard. Der blir nemleg «Den store haustmiddagen» arrangert om kvelden, med heile ti rettar.

Søndagen, som er dagen for årets TV-aksjon, startar med Hausttakkefest i Onarheim kyrkje. Der blir det mellom anna servert kyrkjekaffi og saft, og det blir ein smak av norske grønsaker og frukt. Offergåva går til TV-aksjonen.

For dei som er bøsseberarar for TV-aksjonen på Onarheim, kan turen rundt i nærområdet starta rett frå kyrkja. Også i resten av kommunen skal mange frivillige gå seg ein tur for ei god sak denne søndagen – forhåpentlegvis bada i haustsol og vakre haustfargar.