Inger Lise er vinnaren av The Voice

Sjåarane har talt. Det blei Inger Lise Hope som stakk av med fyrsteplassen i The Voice 2024.

Stavanger-talentet var nummer to på scena i finalen fredag kveld, og framførte «Come What May» frå Moulin Rouge i lag med mentor Espen Lind. Det blei minst like vakkert som venta, og sette eit flott punktum for det gode samarbeidet dei to har hatt gjennom konkurransen.

Fire blei til to

Etter at alle fire finalistane hadde framført sine duettar, var det tid for å avsløra kven to som gjekk vidare til den såkalla superfinalen - del 2 av programmet. Inger Lise var den første som blei ropt opp, og konkurrenten ho stod igjen med til slutt var karismatiske Lavrans Svendsen. No blei stemmene nullstilte, og igjen var det opp til sjåarane å bestemma utfallet.

I superfinalen fekk me høyra Inger Lise syngja «I Have Nothing» av sjølvaste Whitney Houston, og det mangla ikkje på gåsehud-faktor her heller. Også Lavrans gjorde ein god opptreden, men for å gjenta mentor Yosef Wolde-Mariam sine ord litt tidlegare i sendinga: Inger Lise er i ein klasse for seg.

Sett ut

Det var ei ekstremt overraska Inger Lise som tok hendene til ansiktet då ho blei ropt opp som vinnar av The Voice 2024. For uansett om ho syng som ein gud, har ikkje denne kvinna tatt noko som helst for gitt i konkurransen.

– Ehm. Hæ? var dei første ordet vinnaren fekk pressa fram.

Tårer blei tørka. Og ein svært glad Espen Lind sprang opp på scenen for å klemma henne.

– Eg skjønner ingenting, sa Inger Lise vidare.

– Eg er så stolt og glad. Her er den beste stemma i Norge, kommenterte Lind.

Konfettien dryste, publikum jubla, og Inger Lise gjekk frå «I Have Nothing» til å ha sikra seg ein heilektrisk Mustang og ein platekontrakt med Universal Music.

Bladet Tysnes gratulerer!