TIL GJERSTAD: Den legendariske 70-talsgruppa Village People er klare for Tysnesfest 2021. (Pressefoto)

Klare for Tysnesfest 2021

Alle som gleda seg til «Y.M.C.A.» og «Macho Man» på Gjerstad kan pusta letta ut. Village People kjem neste sommar.

Allereie har band og artistar som Hellbillies, TIX og Staysman & Lazz blitt lansert for festivalen i 2021. No er i tillegg fyrste utanlandske gruppe blitt booka om til neste sommar. Village People var ein av dei store internasjonale attraksjonane på 2020-programmet, og er no klare for 2021.

– Eg synest det er utruleg kjekt å få dette til. Village People passar perfekt inn i Tysnesfest-lineupen, fortel ein entusiastisk dagleg leiar for festivalen, Øystein Vaage.

Den legendariske 70-talsgruppa blir ein del av laurdagsprogrammet. Village People er kjend både for sine kostyme og danse-«moves», og ikkje minst for låtar som «Macho Man», «Go West», «In The Navy» og «Y.M.C.A.».

– Eg trur nesten alle mellom 10 og 90 år har eit forhold til Village People. Så å seia alle har høyrt «Y.M.C.A.». Eg trur det nesten ikkje er nokon i den vestlege verda som ikkje har høyrt den låten, fortel Vaage.

«Y.M.C.A.» har over 140 millionar avspelingar på Spotify og musikkvideoen har blitt sett 205 millionar gongar på Youtube, noko som er særs høge tal for ein låt frå 70-talet.

Vaage fortel at dei har jobba for å få flest mogleg artistar frå programmet i 2020 med til 2021, og han er glad for at dei har sikra seg eit av dei utanlandske innslaga.

– Me har vore veldig spente på korleis det skulle gå med dei utanlandske artistane me hadde booka til i år. Situasjonen er jo endå meir alvorleg og valdsam i USA, men Village People var faktisk tidlig på banen og ymta frampå at viss det blei kansellering, så ville dei veldig gjerne koma tilbake neste år, forklarar han.