Klart for EM-debuten
NRK sender direkte frå München når Pernilla Epland skal løpa maraton i EM måndag.
Måndag startar friidretts-EM i München. Klokka 10.30 startar maraton for kvinner, med Pernilla Epland på startstreken i sitt fyrste utandørs-EM. Løpet kan ein følgja direkte på NRK1, eller på NRK TV.
Det er eit knallsterkt felt Pernilla skal løpa mot, med i alt kring 60 kvinner på startstreken. Den største favoritten er nok Nienke Brinkman, som har den sterkaste personlege rekorden av alle i feltet med tida 2.22.51. Det er òg den raskaste tida sett i år av alle i feltet.
Det er eit godt stykke raskare enn Pernilla har løpt. Tysnes-løparen sin personlege rekord er på 2.38.51.
Vêret har vore eit tema i oppkøyringa til meisterskapen, og særleg maraton-øvinga. Det er varmt i store delar av Europa, og München er ikkje eit unntak, med opp mot 30 varmegradar og meir midt på dagen. Arrangørane har fått kritikk for å leggja maraton-øvingane til midt på dagen, men heldigvis ser det ut som løpsdagen blir litt kjøligare enn både dei siste dagane og dei neste dagane. Ifølgje Yr blir det overskya og kring 20 varmegradar, og kanskje litt regn, i det kvinnene startar sin maraton.
Pernilla fekk beskjed om EM-plassen for berre drygt to veker sidan. At beskjeden kom omtrent som lyn frå klar himmel gjer at ho ikkje har hatt ei optimal opplading til meisterskapen. Hadde ho tidlegare i år trudd at ho hadde sjanse til å få EM-plass, hadde ho trent annleis.
– Eg hadde lagt opp treninga heilt annleis, mellom anna med meir mengde. Eg har trent godt, men ikkje spesifikt inn mot å løpa maraton i meisterskap. Så det har ikkje vore noko optimal opplading, sa Pernilla til «Tysnes» då uttaket var eit faktum.
