NYE UTFORDRINGAR: Jostein Epland har signert toårskontrakt med IFK Ystad i Sør-Sverige. Foto: IFK Ystad

Skal spela for svensk toppklubb

I januar vart det klart at Jostein Epland ikkje fekk fornya kontrakten med osloklubben Haslum utover 31. mai i år. No har derimot IFK Ystad i Sverige hanka inn den erfarne handballspelaren frå Stord (med Tysnes-røter), som har over 200 kampar på dei to øvste nivåa i Norge. Det melder bladet Sunnhordland.

– Personleg så har det alltid vore ein gutedraum å få spela handball i utlandet, det er det ingen tvil om. No gler eg meg stort til å koma i gang, seier han til avisa.

Epland er for tida permittert, men planlegg å reisa til Sverige i juni. Den nye kontrakten gjeld for to år, og byrjar å rulla 1. juli.

På IFK Ystad si nettside vert Jostein Epland skildra som ein spelar med bra skotstyrke, godt tempo, og ein som alltid gir 100 prosent. Dei skriv vidare at han er ein lagspelar med eit tydeleg vinnarinnstinkt, og at han vil passa godt inn.

– Me er veldig glade for at Jostein vel IFK som sin neste klubb, og ser fram til utviklinga hans i IFK Ystad, heiter det frå svenskane.