Jektevik–Nordhuglo–Hodnanes

Du les no ei meiningsytring. Den uttrykkjer skribenten si meining.

Hjelpe då meg! Eg blei ikkje berre litt skremd då eg las framlegget til endringar i skiltinga på ferjekaiane i sambandet. No er fylket og Vegvesenet på bærtur. Og bæra dei plukkar, er ikkje etande for vanlege folk.

Les også:

«Hodnanes» blir til «Våge» i ny ferjekaiskilting

Søknaden frå bygdelaget på Huglo er høgst nødvendig og reell. Det er svært ofte meir enn éi rekkje med bilar til Huglo, noko tilbakemeldingane frå mannskapet på Julsund stadfestar.

Men ferja går ikkje til Våge. Ferja går til Hodnanes. Sambandet heiter, på Skyss sine sider, «Jektevik–Nordhuglo–Hodnanes». Det er òg det som SKAL stå på merkinga i felta.

Det er så mykje feil og, orsak språkbruken, så mange idiotiske grunngjevingar for skiltframlegget at ein kan bli kvalm av mindre.

Dersom det skal stå «Stord» på felta på Hodnanes, kvifor skal det då ikkje stå «Tysnes» på skilta på Jektevik-sida? Kva med andre kaiar? Skal det stå «Rosendal» på skilta på Skjersholmane? Eller «Storebø» på sambandet Sandvikvåg–Husavik?

Det blir ikkje berre litt forvirring når ukjende spør matrosen kvar ferja går. «Jo, denne går til Våge.» Overfartstid? Litt over to timar. For Våge ligg jo på andre sida av Tysnes.

Merkinga MÅ vera som ho er i dag: «Hodnanes fv. 549» og «Jektevik E39». Det er forståeleg for dei reisande, men diverre ikkje for kontorfolk i fylket og Vegvesenet, som ikkje har den minste greie på samferdsle.

Her må Tysnes og Stord kommunar, samt Fjord1, komma på banen og instruera styresmaktene om at dei må komma seg tilbake frå bærturen dei er på.