Tysnes kommune lyser fred over HM Kong Harald V sitt minne

Minneord 

Med sorg og takksemd minnest Tysnes kommune Kong Harald V, ein samlande og trygg konge som gjennom meir enn 35 år sette varige spor etter seg.

Det er med stor sorg vi har motteke bodskapen om at HM Kong Harald V er gått bort.

Gjennom meir enn 35 år har kong Harald vore eit samlande symbol for landet vårt. Med ro, varme og ei eiga evne til å vera nær menneske i både gode og vanskelege tider, skapte han tryggleik og tillit.

Kong Harald si samlande kraft vart særleg tydeleg når Noreg vart råka av katastrofar, anten det var terror, ulukker eller naturen som viste kreftene sine. Han reiste ut og møtte menneska som var råka. Med ro, nærleik og ord som gav både trøyst og håp, stod han støtt når landet trong det som mest.

For meg er det særleg «Nordmenn er …»-talen frå Slottsparken i 2016 som står att. Der sette kong Harald ord på breidda i det norske fellesskapet, på alle dei ulike menneska som utgjer landet vårt. Han snakka om kven nordmenn er, om ulik bakgrunn, tru, livssituasjon og måtar å leva livet sitt på. Og han avslutta med eit håp for landet vårt:

«Mitt største håp for Norge er at vi skal klare å ta vare på hverandre.
At vi skal bygge dette landet videre – på tillit, fellesskap og raushet.
At vi skal kjenne at vi – på tross av all vår ulikhet – er ett folk.
At Norge er ett.»

Desse orda seier mykje om det kong Harald stod for. Han minna oss om eit fellesskap der vi kan vera ulike og likevel høyra saman.

Samstundes hadde han eit varmt glimt i auga og ein lun humor som gjorde han menneskeleg og nær. Han kunne vera høgtideleg når situasjonen kravde det, men hadde også ei eiga evne til å møta folk på ein varm og jordnær måte.

Kong Harald og dronning Sonja gjorde det til ei oppgåve å reisa landet rundt og møta menneske der dei bur. I 2009 kom dei til Tysnes. Besøket vart ein festdag for kommunen vår og gav mange tysnesingar eit nært møte med kongeparet.

Kong Harald sitt valspråk var «Alt for Noreg». Gjennom eit langt liv i teneste for landet gav han desse orda innhald.

Vi har mista kongen vår. Men orda hans, verdiane han stod for og kjensla av fellesskap han var med på å skapa, vil leva vidare.

Frå heile Tysnes går det no mange varme tankar til dronning Sonja og den kongelege familien i deira sorg.

På vegner av Tysnes kommune lyser eg fred over HM Kong Harald V sitt minne.