Ny ferjeinnstilling – oppstart i sambandet klokka 11.55

Fredag morgon vart Hodnanes-ferja innstilt på ny.

Oppdatering frå Fjord1 klokka 10.57: Reserveferje er på veg. Oppstart i sambandet er ikkje bekrefta.

Ny oppdatering frå Fjord1 klokka 11.27: MF Lifjord er på plass i sambandet med oppstart frå Hodnanes kl. 11.55 og deretter etter oppsett rutetabell.

Klokka 05.40 kom meldinga frå Fjord1, med følgjande ordlyd: «Grunna driftsproblem vert sambandet innstilt inntil vidare.»

I Skyss-appen blir det opplyst at det er eit teknisk problem som er årsaka til innstillinga.

Til avisa Sunnhordland har regionleiar i Fjord1, Tor Kristoffersen, sagt at årsaka er at overvakinga av den eine batteripakka ikkje fungerer. Vidare opplyser han at prosedyren ved slike feil tilseier at ein ikkje skal gå i rute med passasjerar.

– Dette var det same problemet som for nokre dagar sidan. Dei hadde då reparatørar om bord, som meinte problemet var fiksa. Det var det tydelegvis ikkje, seier Kristoffersen til Sunnhordland.

Sambandet var innstilt også onsdag ettermiddag denne veka. Då tok det om lag tre timar før ferja var i drift igjen.

Fjord1 har rekvirert reserveferje, og ifølgje Marine Traffic er ferja «Lifjord» på veg til Langenuen. Det er den same ferja som blei sett inn i sambandet i august i år, då MF Julsund òg hadde trøbbel og sambandet var innstilt i seks timar.