Å rydda vart som å dansa
Vel tretti personar møtte fram for å rydda fjøra i Asalvika på Vikingnes laurdag.
I duskregn heldt dei på i timevis, og etter kvart utarta ryddinga til pølsegrilling over bål og lettsindig dans til trekkspelmusikk.
Initiativtakar Cecilie Holm opplyser til HF at ti storsekker og litt til vart fylte med søppel. Peter Helland-Hansen gissa at kring 1,2 tonn vart plukka. Berre mikroplast og det som er nedgrave i tang og tare, ligg att. Bergen og omegn friluftsråd skal henta alt saman etter påske.
– Det var herleg å gå frå stranda, snu seg og sjå at no lyser ikkje plasten mot oss lenger, seier Holm.
Ho fortel at det store samtaletemaet på dugnaden var dei store mengdene med lakrissnorliknande plasttrådar.
– Kvar kjem dei frå og kva har dei vore nytta til? Er det nokon som har eit klart svar på kva dei er? Det er i alle fall tretti personar som lurar, fortel Holm, som oppmodar andre om å både rydda plast og å invitera til liknande dugnader.