VIKTIG TEMA: Trond Haukedal vitja Tysnes skule i dag, fredag føremiddag, for å snakka om eigenverd og det å gje kvarandre tid.
VIKTIG TEMA: Trond Haukedal vitja Tysnes skule i dag, fredag føremiddag, for å snakka om eigenverd og det å gje kvarandre tid.

Boosta sjølvtilliten med Trond Haukedal

– Dette var ein oppvekkjar, seier Benedikte Trana.
Publisert 20.09.2019 kl. 16.46.

Ho var ein av elevane frå 7.-10. klasse ved Tysnes skule som fekk høyra føredrag med Trond Haukedal i dag, i samband med markeringa av verdsdagen for psykisk helse.

Temaet for årets markering er «Gje tid».

– Me fekk vita mykje meir om verdsdagen for psykisk helse, og det var mykje me ikkje visste, seier Milena Titoka og Parya Sakhizade.

Jentene synest føredraget var ei god påminning om kva som bør og ikkje bør spela inn for korleis ein har det med seg sjølv.

– Veldig mange er usikre på seg sjølve, i alle fall ungdommar. Det går i kropp, og kor god ein er på skulen, seier Benedikte.

Jentene er einige i at det likevel ikkje burde ha noko å seia.

– Det er viktig å vera fornøgd med seg sjølv. Uansett korleis ein ser ut, er ein like mykje verd, seier Parya.

– Ja, og ein skal ikkje bry seg viss nokon seier noko dumt, for eksempel, held Milena fram.


Gje tid

I løpet av føredraget blei elevane bedne om å ta kvarandre i handa og seia «du er god nok», og «eg er glad i deg».

– Det var ikkje så kleint, det var fint, fortel jentene.

– Kva er det viktigaste de lærte i dag, som de tek med dykk vidare?

– Det med sjølvtillit går litt opp og ned, så me fekk nokre gode påminningar, seier dei.

– At me er vår beste ven for eksempel. Og å gje andre tid. No skal eg hugsa meir på å helsa når eg møter på nokon, held Benedikte fram.

– Og det å gje tid til seg sjølv, avsluttar jentene.


Sosialt fokus

Forutan føredraget for 7. klasse og ungdomsskulen, markerte Tysnes skule verdsdagen for psykisk helse med felles lunsj for 5.-7. klasse.

– Me ønskte å laga noko sosialt, og fann ut at eit måltid vil vera hyggeleg, seier rektor Kari Pettersen.

Det same syntest Mathias Lunde, Robin Rød Epland og Nathaniel Ler Lie, som var med på lunsjen.

– Det er gøy at me alle får eta saman, seier Mathias.

Etter lunsjen var Mathias og Nathaniel med på føredraget med Trond Haukedal.

– Me er spente på kva han vil fortelja, seier dei.

Trond Haukedal er ikkje heilt ferdig med Tysnes, for klokka 18.00 i kveld blir han å høyra nok ein gong i Tysneshallen. Arrangementet er gratis og ope for alle.


LÆRERIKT: Milena Titoka, Parya Sakhizade og Benedikte Trana var godt fornøgde med føredraget med Trond Haukedal.
LÆRERIKT: Milena Titoka, Parya Sakhizade og Benedikte Trana var godt fornøgde med føredraget med Trond Haukedal.
FELLES LUNSJ: Robin Rød Epland (10), Mathias Lunde (12) og Nathaniel Ler Lie (12) syntest det var kjekt at 5.-7. klasse blei samla til eit felles måltid for å markera verdsdagen for psykisk helse.
FELLES LUNSJ: Robin Rød Epland (10), Mathias Lunde (12) og Nathaniel Ler Lie (12) syntest det var kjekt at 5.-7. klasse blei samla til eit felles måltid for å markera verdsdagen for psykisk helse.

Siste saker Gå til framsida

Har fått 100 år gamle draktdelar

Synnøve Hodneland i Tysnes Husflidslag kan fortelja at laget har fått mange gamle draktdelar i gåve frå ein privatperson. Plagga skal vera om lag 100 år gamle, og kjem mellom anna frå Bergsvåg og Solheimsdalen. – Det er blant anna bunadsbelte, brystdukar, bunadsliv, silkeforkle, barnehuer og bunadshuer, fortel Hodneland. På lagskvelden i Husflidstova komande måndag vil Britt Kjellesvik...

Lesarbrev: God søndagstur

På søndag skal Norge nok ein gong gjennomføra verdas største dugnad. 100.000 bøsseberarar går på tur i heile Norge, og samlar inn pengar til velgjerande organisasjonar. Kvart år blir det lagt ned ein stor innsats på Tysnes, og det er kjekt å sjå at gjevargleda til oss tysnesingar er stor kvart einaste år. Skular, lag og organisasjonar, kyrkja, privatpersonar og bedrifter har bidrege for å få...