Avlyser såtekonserten

Tåke stoppar Odd Nordstoga-konserten på Tysnes sin høgaste fjelltopp.

– Utfordrande siktforhold i fjellet gjer at den tradisjonsrike såtekonserten må avlysast, skriv Tysnesfest i ei pressemelding torsdag føremiddag.

Torsdag klokka 13 skulle konserten på toppen av Tysnessåto, 752 meter over havet, ha gått av stabelen. Årets såteartist er Odd Nordstoga, og målet til festivalleiinga var å setja ny publikumsrekord og samla over 3.000 publikummarar på toppen.

Det set dårleg vêr og tåke ein stoppar for. For å gjennomføra konserten er Tysnesfest avhengige av helikopter-transport til og frå toppen.

– Grunna tryggleik så får helikopteret me er avhengig av for å transportera utstyr og artist verken letta frå Sauda eller landa på Tysnessåto. Sjølv om vêrmeldingane ser gode ut seinare i dag, så må alltid tryggleiken gå først. Logistikken går ikkje opp i år, skriv Tysnesfest.

Odd Nordstoga gjer seg i staden klar til konserten han skal ha på Gjerstad i kveld.

– Eg gleda meg veldig til ein tur i fjellet. Fjellskoa er på og trekkspelet er i trekket. Men vêret kan ein jo ikkje gjera noko med. Eg tek gjerne turen til Tysnessåto ein annan gong, med eller utan helikopter. Helst med helikopter då. Eg får berre blåsa i belgen litt ekstra hardt på konserten i kveld, seier Nordstoga.

Sjølv om dårleg sikt stoppa såtekonserten, og torsdag føremiddag har vore prega av nedbør, melder Yr om stadig betre vêr dei komande timane. Det er meld opphaldsvêr både torsdag ettermiddag og kveld, heile fredag og store delar av laurdagen.