Avlyste morgonavgangar på Hodnanes-ferja

Nattleg beredskapstur fører til innstilte morgonavgangar på Hodnanes-Jektevik-Nordhuglo-sambandet.

Etter tre dagar med kansellerte morgonavgangar for Våge-Halhjem-sambandet i løpet av den siste veka, er det Hodnanes-Jektevik-Nordhuglo-sambandet som tysdag morgon avlyser sine tidlegaste avgangar. Årsaka er nattleg beredskapstur.

«På grunn av beredskapstur blir ruten innstilt fra start», skriv Fjord1 i ei driftsmelding litt etter klokka 3 natt til tysdag.

Fyrste avgang blir klokka 09.30 frå Nordhuglo. Fyrste avgang blir klokka 09.45 frå Hodnanes, og sambandet vil deretter vera i ordinær rute.

Hodnanes-sambandet har status som beredskapssamband, som gjer at ferja kan bli nytta til ambulanseoppdrag utanom ordinære rutetider. I løpet av dei siste månadane har Sjøfartsdirektoratet stramma inn på tidlegare gjevne dispensasjonar knytt til kviletidsreglane på fleire samband. Det betyr at beredskapssamband no kan få utfordringar med kviletid dersom dei er ute på nattlege oppdrag.

For Hodnanes-sambandet førte dette også til utsette morgonavgangar i midten av januar.

Samferdslepolitikarane i fylket diskuterte utfordringane i slutten av februar, og onsdag i denne veka skal saka opp til ny handsaming i fylkesutvalet. Eit tiltak som Fylkesdirektøren har peikt på, er å terminera beredskapsordninga for sambanda som har slik status.