Ber bilistar førebu seg på skiftande føre
Publisert
I desse dagar er det mange som pakkar bilen og køyrer av garde på haustferie. I samband med det ber Statens vegvesen bilistar vera førebudde på raskt skiftande køyreforhold. Haustvêr, nattefrost og glatte vegar kan komma overraskande på, særleg for dei som skal mot fjellet.
– Sørg for at bilen er riktig skodd, køyr etter forholda og ta omsyn til andre trafikantar, seier avdelingsdirektør Nils Karbø i Statens vegvesen i ei pressemelding.
Annonse
Vegvesenet rår trafikantane til å sjekka vêr- og føreforhold før avreise og vurdera vinterdekk dersom det er fare for frost. Dei minner òg om å berekna god tid, halda avstand til bilen framfor og ta pausar undervegs.
Lause gjenstandar i bilen bør sikrast, og alle i bilen skal bruka bilbelte. Vegvesenet peikar på at auka trafikk kombinert med skiftande haustføre kan gi meir krevjande forhold på fleire vegstrekningar.
