Eigarlaus jolle funnen på rék

Politiet melder fredag om ein jolle som er funnen i Beltestadvika på Tysnes.

Politiet på Tysnes ynskjer å koma i kontakt med eigaren av den beige-farga jollen. Jollen er kring to og ein halv meter lang utan motor. Oppi båten låg det to lange årar og ei blå Timberland-jakke.

Det var ein innbyggjar i området som fann jollen, og som tipsa politiet. Jollen blei funnen i Beltestadvika i Uggdal, tvers for Tysnes Sjø og Fritid.

Personen som fann jollen har lagt bilete ut på Facebook, utan at eigaren så langt har meldt seg.

Om jollen har ein eigar på Tysnes, eller om den har kome rékande over Bjørnafjorden, er uvisst.

Har du tips om eigaren, kan du kontakta politiet på 02800.