Gratis pizza og god stemning
For andre året på rad hadde Kompasset Bar og Spiseri gleda av å laga til ein peparkakelandsby der bidrag kunne sendast inn. Beste bidrag vart premiert med gratis pizza og drikke. Det var eit imponerande 20-vognstog som vart vinnar.
Årets vinnarar var tredjeklasse på Uggdal skule, og det var god stemning då dei fekk nyta premien torsdag sist veke. Klokka var akkurat passert tolv då me spaserte inn dørene på Kompasset. Der møtte me ein svært glad og engasjert gjeng. Elevane var klare for å eta masse god pizza, og alle var einige om at dette var kjekt å vinna.
Pizzaen fall i smak
Blant elevane me snakka med var jentebordet, beståande av Astrid, Mia, Tuva og Rugile. Dei syntest det var veldig kjekt å laga peparkake-tog, og det artigaste med å laga toga var å eta glasuren som kom på fingrane.
Artikkelen held fram under annonsen.
– Det var òg veldig kjekt å pynta dei.
Jentegjengen meinte at pizzaen var veldig god, og dei hadde det gøy då dei sat rundt bordet.
– Det var kjekt å vinna konkurransen fordi me får vera her å eta pizza og kosa oss.
Stolt lærar
Yvonne Kongsvik Eilertsen er lærar for den heldige klassen, og synest det var gøy at dei vann. Ho fortel at elevane jubla då dei fekk vita det den første veka tilbake etter juleferien.
– Dette har dei gleda seg til i nesten ein månad, fortel Kongsvik Eilertsen.
Ho fortel at borna er svært takknemlege, og det gjer det ekstra kjekt.
– Eg er veldig stolt over elevane som har laga dette, for det var ikkje enkelt. Eg er òg glad for tiltaket som initiativtakar, Marianne, har fått i gang. Det er triveleg at ho gjer slik stas på oss.
Elevane si glede
Marianne Elgsås er drivkrafta bak konkurransen, og synest det er koseleg å gjera stas på elevane.
Artikkelen held fram under annonsen.
– Det er kjekt å sjå gleda når dei kjem hit, fortel ho.
Då «Tysnes» forlét Kompasset var mesteparten av pizzaen eten opp, og alle smilte frå øyre til øyre. Alt tydde med andre ord på at det var ein kjempesuksess som me hadde fått delta på heilt nede ved sjøen i Uggdal.