Helikopterbefaring på Tysnes
Frå søndag eller måndag vil det etter planen bli gjennomført befaring av høgspentlinene på Tysnes frå helikopter.
BKK skal fly over linene med varmesøkjande kamera for å sjekka at dei er i orden, og om det er eventuell varmgang eller andre avvik å finna.
Kontroll av høgspentlinene blir utført årleg, og er eit viktig ledd i å kunna oppretthalda straumforsyninga på ein stabil måte.
Artikkelen held fram under annonsen.
– I år blir det kontroll av radiostøy og varmgang på linene, i tillegg til ei visuell befaring, opplyser Lars Enes, avdelingsleiar for plan og forvaltning i BKK Nett Region Søraust, som dekkjer Tysnes, Kvinnherad og Etne.
Vil bli varsla
Befaringa av høgspentlinene skulle etter planen bli gjennomført før påske, men har blitt utsett på grunn av utfordringar knytt til vêret og koronakrisa.
Med føresetnad om ok vêr- og vindforhold vil kontrollen truleg bli gjennomført på Tysnes frå søndag eller måndag.
– Befaringa vil bli varsla med sms tett i forkant, seier Enes.
Slik vil bebuarar i nær omkrins vera førebudde på helikopterstøy.
Fem dagar
Ifølgje ein grov framdriftsplan kjem flyginga til å starta ved dei nordlege og austlege linene i regionen.
Befaringa skal i utgangspunktet starta i Gulen og Masfjorden. Flyginga vil deretter gå vidare til Osterøy, og derifrå til Tysnes, før BKK skal dekkja Osøyro-Fana, Sotra-Straume og til slutt Lindås.
Totalt er det rekna rundt fem dagar med flyging, med oppstart førebels planlagd fredag.
Artikkelen held fram under annonsen.
