Klart for nytt kommunestyremøte
Tysdag ettermiddag skal dei 21 kommunestyrerepresentantane samlast for andre gong i 2022. Møtet blir sendt direkte på tysnesbladet.no.
Sjølv om det er ei relativt kort saksliste til kommunestyremøtet tysdag, er det fleire viktige saker som skal opp til handsaming. Blant sakene som skal få endeleg vedtak er saka kring mangel på klasserom ved Uggdal skule. Frå hausten av blir det parallellklassar ved alle dei fire trinna på Uggdal skule, men det er berre sju ledige klasserom. Forslaget er difor å leiga klubbhuset til Njardar/Tysnes ved grasbana på Reiso og nytta lokale der til klasserom. Alternativet er å setja opp mellombelse brakkebygg.
I formannskapet for to veker sidan støtta politikarane forslaget om å leiga lokale av Njardar/Tysnes.
Artikkelen held fram under annonsen.
I tillegg til klasserom-saka, skal politikarane drøfta den ferske forvaltningsrevisjonen som har sett på sjukefråværet i kommunen. Då kontrollutvalet såg på saka bad dei Rådmannen om å «ta grep».
Heile kommunestyremøtet blir sendt direkte på tysnesbladet.no. Møtestart er kring 16.30.
Sakslista:
– Referat, skriv og meldingar
– Årsmelding for kontrollutvalet
– Forvaltningsrevisjon av sjukefråvær og personalforvaltning
– Søknad om skjenkeløyve Myrdal Gård
– Behov for klasserom ved Uggdal skule
– Eigedomsskatt - søknad om fritak
Artikkelen held fram under annonsen.
– Plan for atomberedskap
– Ymse
Alle sakspapira ligg på Tysnes kommune sine heimesider.
