Ny nettside

Måndag føremiddag kunne «Tysnes» presentera den nye nettsida si på tysnesbladet.no.

Mange «Tysnes»-lesarar har nok merka at tysnesbladet.no i dag ikkje har sett ut heilt slik den pleier å gjera. Gjennom eit partnarskap med Agderposten har «Tysnes» fått på plass eit nytt produksjonssystem og ei ny heimeside.

– Det er kjempeflott at me har klart å få dette til, fortel ein strålande nøgd redaktør Ole Skaten.

Allereie i november blei avtalen mellom «Tysnes» og Agderposten signert, og sidan den gong har arbeidet med innføringa gått føre seg. Redaktør Skaten skryter av dei tilsette i avisa.

– Me har dyktige medarbeidarar som har klart å få dette til. I tillegg har det vore ekstra hektisk med tanke på koronatida me er oppe i, med tanke på at all kontakt med Agderposten har skjedd via internett. Me har hatt dyktige folk på begge sider, fortel han.

Skaten er godt nøgd med lanseringa av den nye nettsida måndag.

– Det gjekk veldig bra, og det er utruleg kjekt å ha fått dette på plass, seier han.