Smitteutbrot på Uggdal skule
I løpet av helga er smittestatus ved skulen vesentleg forverra. Ti elevar og fire lærarar er no koronasmitta.
– Me oppmodar på det sterkaste om at alle med symptom held seg heima, og at de jamleg tar testar. Dette er einaste måten for å unngå at drifta ved skulen kollapsar, uttalar rektor Bente Raknes i ei melding til alle foreldre med born på Uggdal skule no i kveld.
Som alle er kjende med oppheva regjeringa alle smittevernstiltak laurdag.
Artikkelen held fram under annonsen.
– Potensielt no så brakar det laus, seier Raknes til «Tysnes», og held fram:
– Utfordringa vår blir då å halda hjula i gang framover, at me klarar å halda drifta oppe. Det har til no vore få elevar i klassar som har vore smitta, men no er og fleire lærarar smitta. Det byrjar å røyne på, seier ho.
Det er smitte på alle trinn. Det er all grunn til å tru at desse tala vil auka i løpet av komande veke.
Raknes har i ettermiddag vore i kontakt med kommuneleiing og smittevernlege. Det er etter dette møtet at rektoren sendte ut melding til foreldra gjennom Visma.
Du kan lesa heile meldinga under:
«I løpet av helga er smittestatus ved skulen vesentleg forverra. Me har no ti elevar og fire lærarar som er smitta. Det er smitte på alle trinn. Det er all grunn til å tru at desse tala vil auka i løpet av komande veke.
Underteikna har vore i kontakt med kommuneleiing og smittevernlegen i dag. Dei påpeikar at alle smittevernreglar no har opphøyrt. Det vil sei at me kan gå på skule og jobb sjølv om ein har testa positivt så sant ein er symptomfri. Utfordringa for oss på skulen blir då å klara å halda drifta i gang, og håpa at ikkje alle blir sjuke samtidig. Me har, allereie før smitteutbrotet, ein del sjukemeldingar blant dei tilsette. Denne situasjonen gjer det ikkje enklare. Me legg opp til eit lavt ambisjonsnivå dei neste to vekene, og fokuserer på å halda skule og SFO opne. Lærarane vil ikkje ha kontortid på skulen, det vil ikkje bli møteaktivitet, klassar kan bli slått saman og det vil heilt sikkert vera andre vaksne i klassane enn det det er til vanleg.
Me oppmodar på det sterkaste om at alle med symptom held seg heima, og at de jamleg tar testar. Dette er einaste måten for å unngå at drifta ved skulen kollapsar.
Artikkelen held fram under annonsen.
Me kjem til å halda dykk orienterte om situasjonen etterkvart».
