Snur etter uro rundt fødetilbodet på Stord

Før helga blei det klart at Helse Fonna stoppar planane om å innføra felles avdelingsleiar for føde- og gynekologiavdelingane ved Stord og Haugesund sjukehus. Det kjem fram i ei pressemelding frå helseføretaket sjølv.

Bakgrunnen for forslaget var eit ønske om å sikra fødetilbodet på Stord på lang sikt, mellom anna i møte med færre fødslar og utfordringar med rekruttering.

Les også:

Uro for fødetilbodet etter planar om samanslåing

Forslaget har derimot skapt uro i regionen, der fleire har frykta at endringa kunne føra til ei svekking av både fødetilbodet og sjukehuset på Stord. Formannskapet i Tysnes kommune sende nyleg inn ei fråsegn på vegner av Tysnes kommune der dei støtta opp om eit opprop frå tilsette ved Stord sjukehus om å ikkje gjera den organisatoriske samanslåinga med Haugesund sjukehus som var føreslått.

Administrerande direktør i Helse Fonna, Anders Hovland, seier at han tek bekymringane på alvor, og har difor valt å stoppa prosessen.

Samstundes understrekar han at utfordringane ikkje forsvinn. Helse Fonna må framleis arbeida for å sikra tilstrekkeleg kompetanse og mengdetrening ved dei mindre fødeavdelingane.

Hovland meiner løysinga må vera eit tettare og meir strukturert samarbeid mellom fagmiljøa på Stord og i Haugesund.