Underviste skistjerner i opera

Tysnesing Øyvind Kleppe fekk sjå fire kjende langrennsløparar ta eit langt steg utanfor komfortsonen.

Saman med Emilie Hellum Johansen vart han nemleg hyra inn då Norsk Tipping stelte i stand ein aldri så liten operaduell i Holmenkollen i forkant av Tour de Ski, der Johannes Høsflot Klæbo og Kari Øyre Slind målte stemmebanda mot Therese Johaug og Niklas Dyrhaug.

I videoen som Norsk Tipping har publisert på sine nettsider, kan me sjå at langrennssløparane gjorde store auge då dei fekk høyra Kleppe og Johansen syngja. Og reaksjonane let ikkje venta på seg då dei fekk beskjed om at dei sjølve måtte prøva seg i operagreina. Johaug sin kommentar «Jammen i helsike» seier vel eigentleg sitt.

Så var det tid for litt øving og førebuing. Kleppe fekk ti minutt med kvart par, og innsåg tidleg at dei rett og slett måtte fokusera på å jobba med riktig uttale av orda, og å klara å følgja melodien.

– Å jobba teknisk med dei hadde det ikkje vore nokon nytte i berre ti minutt, seier Kleppe til «Tysnes».

For som Norsk Tipping skriv det så fint; det er lov å håpa at langrennsessa presterer betre i Tour de Ski enn kva dei gjorde som «operafantom». Men innlevinga, den skal dei ha ros for!

– Eg visste ikkje kva eg skulle forventa då eg kom, men eg synest at dei gjorde ein god innsats. Det er openbert at dei ikkje er songstjerner, men eg og produksjonen var fornøgde med at dei kom seg gjennom utdraget frå songen på den tida me hadde, fortel Kleppe.

Det var Therese Johaug og Niklas Dyrhaug som stakk av med sigeren i duellen.

Camilla Korsnes camilla@tysnesbladet.no