Rådmannen sa nei til kai, politikarane sa ja
Politikarane i landbruk/teknisk sa på sist møte samrøystes ja til bygging av kai i tilknyting til eksisterande naust på gnr. 19, bnr. 11, Høviskeland. Det er Kirsten A. Kjerland og Ingjald Selland som har søkt om løyve til oppføring av kai.
Rådmannen hadde gjort framlegg om avslag på søknaden. Ingen røysta for framlegget frå Rådmannen.
Artikkelen held fram under annonsen.
Søknaden om dispensasjon for bygging av kai i tilknyting til sjøbua på Høviskeland stod fyrste gong på sakslista i utvalet på septembermøtet i fjor.
Den gongen hadde også Rådmannen gjort framlegg om avslag. I innstillinga frå Rådmannen heitte det:
– Med heimel i plan- og bygningslova vert det ikkje gjeve dispensasjon frå vedteke arealbruk F- og LNF- område og byggjeforbodet i 100-metersbeltet langs sjøen til oppføring av kai som omsøkt på gnr.19, bnr.11.
Politikarane gjekk ikkje inn for innstillinga frå Rådmannen. På septembermøtet gjorde dei følgjande vedtak:
– Landbruk/teknisk ser det som positivt at tiltakshavar ynskjer å bevara sjøbua og ta vare på omsøkte eigedom. Det at det blir etablert kai i tilstøting til dette bygget vil vera ein klar fordel med tanke på begynnande utgliding av grunnmur, samt gjera vedlikehald og tilsyn med bygget svært mykje enklare. Kaien vil vera med å sikra bygget frå vidare forfall, heitte det i vedtaket frå september-møtet.
Statsforvaltaren klaga på det positive vedtaket til politikarane i Tysnes. Saka kom opp att i utvalet på oktober-møtet, men blei utsett for nye innspel frå tiltakshavar.
Då saka kom opp att på februarmøtet i år, hadde Rådmannen på ny innstilt på avslag, og at klagen frå Statsforvaltaren blei teken til følgje.
– Eg er innstilt på å oppretthalda vedtaket frå 1. september i og med at det ikkje er kome nye innspel i saka, sa utvalsleiar Øystein Dalland då han opna for debatt.
Artikkelen held fram under annonsen.
– Eg synest det vedtaket som me landa på i september, var eit godt vedtak, kommenterte nestleiar Magne Storesætre (H).
Ingen røysta for framlegget frå Rådmannen. Vedtaket frå septembermøtet i fjor blei samrøystes vedteke.
