Delte ut midlar til leikeplass og sherpasti

Sparebanken Vest vitja Tysnes sist veke for eit lite pengedryss til lokale prosjekt.

– Banken sin visjon er å gjera Vestlandet til ein litt betre stad å bu, sa Olav Hovland i Sparebanken Vest då han var på Tysnes for å dela ut pengar i sist veke.

Via Sparebankstiftinga sitt eldsjelfond blei ein kvart million kroner fordelt ut til to ulike prosjekt på Tysnes. Patrick Russell Madsen tok imot 55.000 kroner til leikeplassen i Våge, medan Merete Fjelltveit Flakke og Per Ingolf Økland frå Venelaget Tysnessåto fekk tildelt 200.000 kroner til sherpasti-prosjektet.

Fullfinansiert

– Dette var veldig kjekt. No har me klart å fullfinansiera prosjektet heilt utan å bruka kommunale midlar, seier ein nøgd Patrick Russell Madsen.

No er nesten alle oppgraderingane i hamna i boks. Det inkluderer ny leikeplass, ny boss- og resirkuleringsstasjon og badebryggje. Det einaste som står att er eit badehus som kjem til hausten. Madsen er godt nøgd med kor mykje dei nye fasilitetane har blitt brukt.

– Når ein ser kor mykje det blir brukt så har det heilt klart vore verdt arbeidet. Og eg vil takka alle som har vore med på dugnad, avsluttar han.

Ny fase

Også Fjelltveit Flakke og Økland er godt nøgde med tildelinga, og fortel at dei no er klare til å ta sherpasti-prosjektet eit nytt steg vidare.

– Dette er heilt eineståande. Eg er veldig godt nøgd med at dei støttar prosjektet. No er me i mål med finansieringa av byggjetrinn 1, fortel Fjelltveit Flakke.

Det betyr at prosjektet går inn ein ny fase.

– No veit me at prosjektet er realiserbart, og då kjem me utover hausten til å jobba meir detaljert med planlegging, seier ho.

Heile prosjektet er stort og kostnadskrevjande, og har blitt delt opp i fleire byggjetrinn. Dermed kan arbeidet med byggjetrinn 1 gå i gang samstundes med at ein jobbar med å finansiera byggjetrinn 2. For å få finansiert trinn 1 har dei mellom anna fått støtte frå kraftlaget.

– Det blir veldig spennande å koma ordentleg i gang med prosjektet, og eg håpar me finn løysingar som alle blir fornøgde med, også dei som er skeptiske til prosjektet, avsluttar Fjelltveit Flakke.

Eldsjelfondet

Olav Hovland, som er regiondirektør for Sparebanken Vest sin bedriftsmarknad i Sunnhordland og på Haugalandet, sette stor pris på å koma til Tysnes og dela ut pengar. Han har sjølv vakse opp på Tysnes.

– Det er kjekt for meg som tysnesing å dela ut ein kvart million til gode, lokale formål, fortel han.

Eldsjelfondet er på 100 millionar, og blir delt ut til lag, organisasjonar og eldsjeler som ynskjer å dra i gang ulike prosjekt og initiativ. Hovland fortel at det er ope for at fleire lokale lag kan søkja, slik Madsen og Venelaget Tysnessåto har gjort.

– Det er berre å søkja, avsluttar han.