Får framleis pressestøtte

Lokalaviser med eit opplag på mellom 4.000 og 6.000 skal framleis få pressestøtte. Det melder Kulturdepartementet. I ei pressemelding som er sendt ut frå departementet i dag, fredag, skriv kulturministeren at opplagsgrensa for produksjonstilskotet blir oppretthalde på 6.000 for år 2014, men at både dette og eit tak på 40 millionar skal vurderast i ei stortingsmelding med eventuell verknad frå 2015. Generalsekretær Rune Hetland i Landslaget for Lokalaviser (LLA) er nøgd. – Me set pris på at Kulturdepartementet har lytta til oss og ikkje vil kutta produksjonsstøtta til aviser med mellom 4.000 til 6.000 i opplag, seier Hetland.LLA har lagt ned eit stort arbeid for å informera både departementet, Stortinget og enkeltparti om at forslaget om kutt ville få svært uheldige konsekvensar. – Det er godt å sjå at me har nådd fram – så langt, seier Hetland, som gjerne hadde sett at saka var lagt heilt død.