Sjekk prisutviklinga før du slår til på Black Friday-tilbod
Under Black Friday, Black Week og Black Month haglar det med tilbod. Eller gjer det eigentleg det? I ei undersøking utført av Norstat for Frende Forsikring seier to av fem at dei har vore usikre på om dei faktisk gjorde eit kupp eller ikkje.
– Folk har fått med seg mediesakene om at mange butikkar skrur opp prisane før Black Week-perioden startar, seier seniorrådgjevar Marius Solberg Anfinsen i Frende Forsikring.
Tenesta Godpris har undersøkt 300 av sine mest populære produkt og funne ut at frå starten av september til 26. oktober i år hadde 29 prosent av produkta fått minst fem prosent høgare lågastepris.
– Det underbyggjer folk si oppfatning av at me må ta tilboda med ei klype salt, men det er veldig synd for dei som faktisk kjem med reelle tilbod. Klart dei som handlar blir forvirra og usikre, seier banksjef i Sparebanken Norge, Ruth Rabbe.
Ho meiner Black Week speler på eit effektivt verkemiddel: frykta for å gå glipp av noko.
– Når tilbodet blir presentert som tidsavgrensa og at lageret blir fort tømt, tar mange raskare avgjerder enn dei elles ville gjort. Då er det lett å kjøpa noko sjølv om magekjensla seier at tilbodet kanskje ikkje er så fantastisk som reklamen lover.
Frende og Sparebanken Norge rår til at ein bruker nokre minutt på å sjekka prisutviklinga for vara før ein handlar. Det er også lurt å venta nokre timar før ein gjer eit stort innkjøp, kanskje til og med også sova på det.