Frå gul til grøn beredskap i Helse Fonna

I ei pressemelding tysdag opplyser Helse Fonna at dei går frå gul til grøn beredskap, noko som gjer dei i stand til å auka aktiviteten att. Gul beredskap vart innført 17. mars, men no er situasjonen ein heilt annan enn sist månad. På det meste har helseføretaket hatt 12 innlagde covid-19-pasientar.

– Smittesituasjonen i vårt distrikt er under kontroll, takk vere god innsats frå innbyggjarar og kommunar. Talet på pasientar har stabilisert seg på eit lågare nivå, og det er difor på tide å justera ned beredskapsnivået til grønt, opplyser administrerande direktør i Helse Fonna, Olav Klausen.

Kohortavdelinga på Haugesund sjukehus vert ikkje rigga ned før talet på pasientar er ytterlegare redusert, men plan for nedrigging er klar.

– Me prøver no å komma tilbake til tilnærma normal drift, seier Klausen, som minner om at Helse Fonna framleis er i beredskap, og at situasjonen kan endra seg att.

– Pandemien er ikkje over, og me ser at smittetala aukar både sør for Boknafjorden, og i Bergen. Difor må me vera førebudde på at talet på smitta kan auka att også på Haugalandet, seier Klausen.

Helse Fonna oppmodar pasientar om å møta til timen sin som avtalt, med mindre dei får beskjed om anna.

Når det gjeld pårørande, er oppfordringa framleis at ein vurderer i kva grad besøk er nødvendig.

– Dess fleire som kjem inn dørene, dess større er sjansen for at nokon tek med seg smitte inn. Difor ber me om så lite besøk som nødvendig, seier Klausen.