Innfører nye koronatiltak ved sosiale samankomstar

Frå og med natt til onsdag trer ei rekkje nye nasjonale covid 19-anbefalingar i kraft. Mellom anna bør ein ikkje ha meir enn fem gjestar i private hus og hytter.

– Me står framfor den mest alvorlege situasjonen med å snu smitten sidan mars. Dersom me tar eit krafttak no, er det mykje større sjanse for at me kan få ei normal julefeiring med storfamilien, seier statsminister Erna Solberg i ei pressemelding.

Måndag ettermiddag la regjeringa fram ei rekkje nye tiltak for å hindra smittespreiing av koronaviruset. Ikkje sidan mars har smittetalet i Norge vore så høgt som no, og regjeringa kjem derfor med strengare råd og anbefalingar enn tidlegare, spesielt knytta mot sosiale samankomstar.

– Me strammar inn på ei rekkje område for å få mindre smitte i samfunnet. Det vil gjera det enklare å halda barnehagar og skular opne, og det er ein viktig prioritet for regjeringa, seier kunnskaps- og integreringsminister Guri Melby i den same pressemeldinga.

Tiltaka er som følgjer:

- Ein bør ikkje ha meir enn fem gjestar i private hus, hagar og hytter, i tillegg til hustandsmedlemmar. Dersom alle gjestane er frå same husstand, kan ein vere fleire enn fem. Ein kan òg ha fleire enn fem gjestar, dersom alle er i same kohort i barnehagen eller barneskulen.

- Ein blir anbefalt å vera i lag med færre personar i sosiale samanhengar. Ein bør vera kortare tid i lag med andre, og ein bør ikkje vera i lag med for mange forskjellige personar.

- Private samankomstar på offentleg stad kan ha maksimalt 50 deltakarar. Dette gjeld også private samankomstar i leigde eller lånte lokale.

- Det er i dag lov å ha inntil 600 personar til stades på arrangement utandørs. Frå no av gjeld dette berre arrangement der alle publikummarane sit i fastmonterte sete.

- Det blir føreslått å styrka kommunane når det gjeld å kontrollera reglane for arrangement, serveringsstader og arbeidstakarar.

Regjeringa strammar òg inn reglane for arbeidsinnvandring, mellom anna ved at utanlandske arbeidstakarar frå «raude land» ikkje lenger vil vera unnatake karanteneplikta.

Til slutt presenterte regjeringa ei oppdatert liste med potensielle tiltak kommunar med lokale smitteutbrot bør vurdera å innføra. Desse potensielle tiltaka inneber mellom anna å redusera grensa for deltakarar på innandørs arrangement til 20 personar, og innføra munnbindpåbod ved kollektivreiser og på offentlege stadar innandørs der ein ikkje kan oppretthalda éin meters avstand.

Kommunar kan òg vurdera å innføra påbod om heimekontor for arbeidstakarar med oppgåver som ikkje krev fysisk oppmøte heile eller deler av arbeidsveka, og at ein ikkje bør vera i kontakt med meir enn ti personar i sosiale samanhengar, ut over husstandsmedlemmar og barnehage- og barneskulekohortar.