Jobbar med løysing

Torsdag kveld kom som kjent beskjeden om at MS Kommandøren nok ein gong måtte innstille ferga resten av dagen. Det innebar at alle avgangar frå og med klokka 20.30 frå Våge utgjekk resten av dagen.

Årsaka skulle vere eit teknisk problem, og klokka 23.36 melde Fjord 1 at dei var i normal drift frå rutestart i dag tidleg, men at ein måtte forvente litt forseinkingar i tråd med rutetabell på grunn av den tekniske feilen.

Den tekniske feilen er ein øydelagt lem, så det betyr at Kommandøren berre kan leggjast til dokk ein veg. Det inneber mellom anna at trailerar må rygge seg ut og stå motsett veg i forhold til personbilar som får snudd til rett veg inne på ferga. Me snakka med operativ leiar for MS Kommandøren, Bjørn Barstad, som fortel at det førebels er best at sambandet går som det er no.

– Me jobbar med å få fiksa lemen, og målet er å få fiksa det så fort som mogleg. Vi treng nokre delar for å få det fiksa, så vi ser på alternativa.

Barstad fortel vidare at han reknar med dei skal halde rutene passande.

– Me hentar oss inn i pausane, og eg har trua på at det skal gå bra. Så får me gjera vurderingar undervegs, seier han avslutningsvis.

Klokka 10.13 melde Fjord 1 følgjande: «Grunna teknisk feil må større kjøretøy pårekne å måtte rygge ombord ved ombordkjøring. Dette gjelder inntil vidare.»